Einstaklega góðar kúmen brauðbollur

Þessi uppskrift hefur fylgt mér í yfir 20 ár, eða alveg síðan ég keypti mér mína fyrstu matreiðslubók nokkrum mánuðum áður en ég flutti til Danmerkur með kærastanum mínum (eiginmanni í dag) og við byrjuðum að búa.  Ég man ennþá eftir því þegar við bökuðum þessar bollur í fyrsta sinn í litla eldhúsinu okkar í Kaupmannahöfn. Síðan þá hafa þessar bollur verið bakaðar ótal sinnum og eru í sérstöku uppáhaldi hjá okkur, börnin öll elska þær líka og finnst þær vera bestu brauðbollur í heimi. Þær eru oft á borðum í afmælisveislum hjá okkur og vekja alltaf jafn mikla lukku.

Uppskriftin er upphaflega úr matreiðslubókinni “Ferskt & framandi” sem gefin var út af Nýkaup sem var og hét en við höfum lagað hana örlítið til með árunum.

500g hveiti
3 tsk þurrger
1 tsk lyftiduft
4 msk sykur
1 tsk salt
70g smjör
2 dl mjólk, ylvolg
1 dl AB mjólk, ylvolg
1 egg
4 msk kúmen
Ostur

Blandið þurrefnunum saman í hrærivélaskál, setjið mjólk, AB mjólk og smjör saman í lítinn pott og velgið. Hellið volgu blöndunni út í þurrefnin ásamt egginu og hnoðið vel þannig að deigið sé laust frá skálinni. Látið deigið hefast í 45 mínútur.
Þegar deigið hefur hefast er það sett á hveitistráð borð, en ekki hnoða það neitt samt. Takið klípu af deiginu og mótið bollur ca 55g hvert stykki (já ég vigta þær því ég vil hafa þær allar svipað stórar) og raðið á bökunarpappírsklædda bökunarplötu, fyrsta fer í miðjuna og svo hinar í kring þannig að bollurnar mynda einskonar blóm. Ekki klessa þeim alveg saman svo þær hafi örlítið rými til að hefast.

Ég reyni alltaf að hnoða bollurnar sem minnst svo þær verði sem mest fluffy, ég tek bara klípu af deiginu set á vigtina og svo rétt rúlla ég þeim í lófanum svo þær verði nokkurn veginn hringlaga (alls ekki hnoða í fullkomnar bollur því þá verðar þær þéttari) . Þegar búið er að raða bollunum á bökunarplötuna er gott að leyfa þeim að hefast í ca 20 mín ef tími gefst til því þá verða þær ennþá loftmeiri, en ekki bráðnauðsynlegt.

Áður en bollurnar fara í ofninn er lögð ein sneið af osti ofan á hverja bollu og svo eru þær bakaðar við 180°c á blæstri í uþb. 15-18 mínútur eða þar til bollurnar hafa fengið gylltan lit.

Gott er að setja eldfast mót í botninn á ofninum þegar kveikt er á honum og skvetta svo 1 dl af vatni í það þegar bollurnar eru settar inn og loka strax, þá myndast gufa í ofninum, svona eins og er gert í bakaríum og gera þær extra góðar…en við gerum það nú samt ekkert sérlega oft samt og þess þarf ekki.

Bestar nýbakaðar og volgar með miklu smjöri og osti.

Bollurnar eru líka vinæslar í nestixboxin fyrir skólann samhliða ávöxtum og grænmeti.

Ef þú prófar þessa uppskrift þá máttu endilega deila því með mér, með því að taka mynd og deila á Instagram með #infantiais eða merkja myndina með @infantia.is

Kókoskúlur í jólafötum

Ég hef áður deilt með ykkur uppskriftinni minni af kókoskúlum sem eru ótrúlega góðar og auðvelt að gera. Núna ákvað ég að skella þeim í jólafötin og útkoman var algjört æði.

100 g döðlur (Meedjol eru bestar en alveg hægt að nota þurrkaðar líka)
1 1/2 dl haframjöl
1/2 dl kókosmjöl
2 msk hreint kakó
1/4 tsk vanilluduft (hrein vanillukorn, ekki vanillusykur)
1 tsk kókosolía
3 msk vatn
Frostþurrkuð hindber, möluð nokkuð fínt í matvinnsluvél eða mortéli

Best er að nota Medjool döðlur en ef þær eu ekki til er hægt að nota þurrkaðar, bara klippa þær niður í nokkra bita og leggja í bleyti í kalt vatn í 30 mínútur, hella svo vatninu af og þá eru döðlurnar klárar.

Öll innihaldsefnin sett í matvinnsluvél og unnið mjög vel saman þar til þetta er orðinn fínn massi. Kúlur mótaðar og velt uppúr möluðum hindberjunum, sett í kæli í 1-2 tíma og þá eru þær tilbúnar.
Geymast í kæli í vel lokuðu íláti í 2-3 daga

Þessar kúlur innihalda engan hvítan sykur en eru sannkallaðir orkuboltar, það má alveg lauma einni og einni með í nestisbox krakkanna af og til eða eiga hádegisnestinu í vinnunni til smá tilbreytingar.



Ef þú prófar þessa uppskrift þá máttu endilega deila því með mér, með því að taka mynd og deila á Instagram með #infantiais eða merkja myndina með @infantia.is

Rice Krispies kökur

Rice Krispies kökur eru klassík í barnaafmælum, amk í minni fjölskyldu, og reyndar ekkert bara í afmælum, við gerum þær líka stundum bara til að eiga um helgar. Það er svo auðvelt og fljótlegt að skella í þær og krökkunum finnst gaman að hjálpa til. Ég hef notað sömu uppskriftina árum saman og ýmist notað Rice Krispies eða Cheerios og finnst bæði mjög gott. Um daginn ákvað ég að gera tilraun og sleppa hefðbundnu sírópi og nota í staðinn Sweet Like Syrup frá GoodGood en það er sykurlaust, þó það finnist alls ekki á bragðinu. Kökurnar heppnuðust ótrúlega vel og framvegis mun ég gera þær svona. Þeir sem vilja minnka sykurinn enn meira geta notað sykurlaust súkkulaði í uppskriftina.

Uþb. 35 mini kökur

100g dökkt súkkulaði (ég nota alltaf Sirius Konsum)
20g smjör
4msk Sweet Like Syrup
3 bollar Rice Krispies
Gott sjávarsalt t.d. Maldon (má sleppa)

Setjið súkkulaðið, sírópið og smjörið í  pott og bræðið saman við vægan hita, takið af hitanum og bætið Rice Krispies útí og blandið öllu vel saman. Setjið í lítil form, mér finnst voða gott að strá örlitlu sjávarsalti yfir, það spilar svo vel saman með sætunni. Sett í kæli eða frysti.

Ef þú prófar þessa uppskrift þá máttu endilega deila því með mér, með því að taka mynd og deila á Instagram með #infantiais eða merkja myndina með @infantia.is

Nestis pizzur

Foccacia og pizza mætast í eitt í þessari uppskrift og útkoman er æðisleg! Þessi uppskrift er stór en hentar vel til að baka úr og setja í frystinn til að eiga í nestisboxið fyrir börnin. Þær bragðast vel bæði heitar og kaldar og hægt að leika sér með áleggið að vild.

Pizzur

4 dl heilhveiti
5 dl hveiti
4 tsk þurrger (1 pakki)
4 dl volgt vatn (37°c)
2 msk ólívuolía
1 tsk gott sjávasalt t.d. Maldon
1 tsk sykur
Pizzu sósa
Rifinn ostur
Skinka
Pepperoni
Góð ólífuolía

Setjið gerið út í vatnið og látið standa nokkrar mínútur þar til froða myndast. Bætið olíu og sykri út í. Hveiti, heilhveiti og salti blandað saman og svo bætt í smátt og smátt út í gerblönduna. Degið hnoðað mjög vel saman og látið hefa sig við stofuhita í amk. 30 mínútur.

Þegar deigið hefur hefast  er því skipt í 32 hluta (færri ef þú vilt hafa pizzurnar stærri) og mótaðar kúlur, þrýstið ofaná með lófanum og teygið út þannig að deigið verði flatt (uþb. 1 cm á þykkt). Leggið á bökunarplötu og látið hefast í nokkrar mínútur.  Þrýstið fingri í deigið 3-4 sinnum til að mynda smá dældir í deigið og dreifið góðri ólífuolíu yfir. Dreifið pizzu sósunni á deigið, stráið rifnum osti yfir og setjð svo pepperoni og skinku ofan á eða annað álegg sem ykkur dettur í hug.

Bakað við 200°c á blæstri í 11-15 mínútur, eða þar til gullið og fallegt. Mjög gott að setja klettasalat og rifin parmesan yfir þegar pizzurnar koma út úr ofninum.

Það er líka hægt að gera hvítlauksbrauð úr þessari uppskrift, merja hvítlauk út í olíuna áður en henni er dreift yfir. Sjávarsalti stráð yfir og bakað eins og fram kemur hér að ofan, mjög gott til að bera fram með mat.

Ef þú prófar þessa uppskrift þá máttu endilega deila því með mér, með því að taka mynd og deila á Instagram með #infantiais eða merkja myndina með @infantia.is