Einstaklega góðar kúmen brauðbollur

Þessi uppskrift hefur fylgt mér í yfir 20 ár, eða alveg síðan ég keypti mér mína fyrstu matreiðslubók nokkrum mánuðum áður en ég flutti til Danmerkur með kærastanum mínum (eiginmanni í dag) og við byrjuðum að búa.  Ég man ennþá eftir því þegar við bökuðum þessar bollur í fyrsta sinn í litla eldhúsinu okkar í Kaupmannahöfn. Síðan þá hafa þessar bollur verið bakaðar ótal sinnum og eru í sérstöku uppáhaldi hjá okkur, börnin öll elska þær líka og finnst þær vera bestu brauðbollur í heimi. Þær eru oft á borðum í afmælisveislum hjá okkur og vekja alltaf jafn mikla lukku.

Uppskriftin er upphaflega úr matreiðslubókinni “Ferskt & framandi” sem gefin var út af Nýkaup sem var og hét en við höfum lagað hana örlítið til með árunum.

500g hveiti
3 tsk þurrger
1 tsk lyftiduft
4 msk sykur
1 tsk salt
70g smjör
2 dl mjólk, ylvolg
1 dl AB mjólk, ylvolg
1 egg
4 msk kúmen
Ostur

Blandið þurrefnunum saman í hrærivélaskál, setjið mjólk, AB mjólk og smjör saman í lítinn pott og velgið. Hellið volgu blöndunni út í þurrefnin ásamt egginu og hnoðið vel þannig að deigið sé laust frá skálinni. Látið deigið hefast í 45 mínútur.
Þegar deigið hefur hefast er það sett á hveitistráð borð, en ekki hnoða það neitt samt. Takið klípu af deiginu og mótið bollur ca 55g hvert stykki (já ég vigta þær því ég vil hafa þær allar svipað stórar) og raðið á bökunarpappírsklædda bökunarplötu, fyrsta fer í miðjuna og svo hinar í kring þannig að bollurnar mynda einskonar blóm. Ekki klessa þeim alveg saman svo þær hafi örlítið rými til að hefast.

Ég reyni alltaf að hnoða bollurnar sem minnst svo þær verði sem mest fluffy, ég tek bara klípu af deiginu set á vigtina og svo rétt rúlla ég þeim í lófanum svo þær verði nokkurn veginn hringlaga (alls ekki hnoða í fullkomnar bollur því þá verðar þær þéttari) . Þegar búið er að raða bollunum á bökunarplötuna er gott að leyfa þeim að hefast í ca 20 mín ef tími gefst til því þá verða þær ennþá loftmeiri, en ekki bráðnauðsynlegt.

Áður en bollurnar fara í ofninn er lögð ein sneið af osti ofan á hverja bollu og svo eru þær bakaðar við 180°c á blæstri í uþb. 15-18 mínútur eða þar til bollurnar hafa fengið gylltan lit.

Gott er að setja eldfast mót í botninn á ofninum þegar kveikt er á honum og skvetta svo 1 dl af vatni í það þegar bollurnar eru settar inn og loka strax, þá myndast gufa í ofninum, svona eins og er gert í bakaríum og gera þær extra góðar…en við gerum það nú samt ekkert sérlega oft samt og þess þarf ekki.

Bestar nýbakaðar og volgar með miklu smjöri og osti.

Bollurnar eru líka vinæslar í nestixboxin fyrir skólann samhliða ávöxtum og grænmeti.

Ef þú prófar þessa uppskrift þá máttu endilega deila því með mér, með því að taka mynd og deila á Instagram með #infantiais eða merkja myndina með @infantia.is

Banana og hindberjamauk með vanillu

Ferskt og gott mauk sem er fljótlegt að útbúa.

1 vel þroskaður banani
Nokkur hindber 
1/4 tsk hreint vanilluduft

Ef notuð eru fersk hindber þarf bara að skola þau vel, en ef notuð eru frosin þarf að skella þeim í sjóðandi vatn í 1 mínútu eða gufusjóða í nokkrar mínútur.

Allt maukað saman með töfrasprota eða stappað saman með gaflli fyrir grófari áferð.

Geymist í sólarhring í ísskáp í vel lokuðu íláti og mánuð í fyrsti.

Ef þú prófar þessa uppskrift þá máttu endilega deila því með mér, með því að taka mynd og deila á Instagram með #infantiais eða merkja myndina með @infantia.is

Pizzu vöfflur

Skemmtileg tilbreyting við hefðbunda pizzu sem á heima á afmælisborðinu, í nestisboxinu ásamt  ávöxtum og grænmeti, í lautarferðinni eða hvar sem er.

Einfaldar og bragðgóðar sem hægt er að grípa með sér, ljúffengar bæði heitar og kaldar. Það er hægt að leika sér með fyllinguna að vild t.d. gott að setja eldaðan kjúkling sem gerir þetta næringar- og matarmeira, grænmeti, ferskan mozzarellaost og ferska tómata eða hvað sem ykkur dettur í hug, en þessi útgáfa er einföld og eitthvað sem fellur í kramið hjá flestum.

Pizzudeig
Pizzusósa
Rifinn ostur
Skinka
Pepperóní

Ég notaði tilbúið deig í rúllu, flatti það aðeins þynnra út en það kemur og svo skar  ég út hæfilega stóra hringi sem passa í vöfflujárnið mitt, en ég nota belgískt vöfflujárn.  Sósa, ostur og álegg sett á annan hringinn, hinn hringurinn settur ofan á og kantarnir pressaðir vel saman svo lokist vel, það getur verið gott að pensla kantana á neðri hringnum með smá vatni til að hringirnir límist vel saman.

Sett í vöfflujárnið og bakað í 6-7 mínútur eða þar til vöfflurnar eru gullnar og fallegar á litinn.

Fínt að eiga í ísskápnum og skella í brauðristina eða hita í örbylgunni.

Afskurðinn meðfram hringjunum penslaði ég með olíu, kryddaði með hvítlaukssalti og pipar, sneri uppá svo úr uðu einhversskonar stangir, setti á pökunarplötu og stráði rifnum osti yfir, inní ofn í nokkrar mínútur og úr urðu þessar fínu hvítlauks brauðstangir. En það er auðvitað hægt að hafa vöfflurnar bara ferkantaðar, fljótlegra og enginn afskurður.

Ef þú prófar þessa uppskrift þá máttu endilega deila því með mér, með því að taka mynd og deila á Instagram með #infantiais eða merkja myndina með @infantia.is

Kókospönnukökur

Þessar pönnukökur eru algjörar uppáhalds og gaman að gera t.d. um helgar þegar gera á vel við sig, geggjaðar hvort sem er í morgunmat, með kaffinu eða sem millimál. Þær innihalda enga óhollustu og því er hægt að njóta þeirra með góðri samvisku, ég tala nú ekki um ef meðlætið með þeim er vel valið líka.

2 egg
1 miðlungsstór vel þroskaður banani
1/2 bolli kókosmjöl
1/2 tsk vanilluduft
Kókosolía til steikingar

Bananinn stappaður og öllu blandað vel saman. Panna smurð með kókosolíu og smá deig sett á pönnuna, dreift aðeins úr með skeið og steikt við miðlungshita í nokkrar mínútur á hvorri hlið þar til fallega gylltar.

Borið fram með t.d. bláberjum, jarðaberjum, hindberjum eða öðrum ávöxtum og góðu sírópi, sultu eða súkkulaðismjöri.

Pönnukökurnar má líka gjarnar stinga í nestisboxið ásamt ávöxtum.

Fyrir nokkru síðan fékk ég að prófa vörurnar frá íslenska fyrirtækinu GoodGood (ég hafði að vísu verið að nota bæði Choco Hazel og Sweet like sugar áður). Vörurnar þeirra eru ekki bara ótrúlega bragðgóðar heldur líka góðar fyrir kroppinn. Þær innihalda engan sykur en notast er við náttúruleg sætuefnin eins og stevíu og sykuralkóhóla á borð við maltitol og erítrítól. Vörurnar hafa miklu minni áhrif á hækkun blóðsykurs en hvítur sykur gerir, og sumar þeirra hækka hann alls ekki. Þessar vörur eru frábærar fyrir þá sem vilja gómsætt bragð en minni óhollustu.

Þetta súkkulaðismjör er dásamlega gott og okkur öllum þykir það betra en hið eina sanna Nutella og þá er nú mikið sagt því börnin mín 2 elstu hreinlega elska það.

Sírópið er líka ótrúlega bragðgott og kemur algjörlega í stað hlynsíróps á pönnukökurnar.

Færslan er unnin í samstarfi við GoodGood en það en það hefur þó engin áhrif á álit mitt vörunum.

Ef þú prófar þessa uppskrift þá máttu endilega deila því með mér, með því að taka mynd og deila á Instagram með #infantiais eða merkja myndina með @infantia.is