Vertu velkomin/n á síðuna mína. Ég heiti Íris og er ljósmyndari að mennt, á frábæran eiginmann og við eigum 4 dásamleg börn,  Dagbjörtu 15 ára, Aron 12 ára, Ástrós 7 ára og Emil 4 ára.

Þegar við urðum foreldrar í fyrsta sinn vorum við búsett í Danmörku og þar tíðkaðist ekki að kaupa tilbúinn barnamat heldur að búa hann til frá grunni. Það gerðum við samviskusamlega enda miklu minna mál en mig hafði nokkurn tímann grunað. Þegar við fluttumst til Íslands ári síðar þekktum við ekkert annað en að útbúa matinn sjálf. Það kom mér hins vegar á óvart að flest allir sem ég þekkti til og voru með lítil börn hér heima keyptu tilbúinn barnamat. Ég prófaði að kaupa pakkagrauta og mauk til að geta gripið til ef tími til matseldar væri naumur en stelpan okkar leit ekki við því. Úr varð því að hún borðaði eingöngu mat eldaðann frá grunni og það sama gilti um drenginn okkar sem fæddist 3 árum síðar. Þegar þriðja barnið bættist í hópinn flýtti ég þó stundum fyrir mér og greip í lífræna grauta sem fljótlegt var að útbúa en allt mauk gerði ég þó sjálf.
Yngsta barnið okkar kom í heiminn í júlí 2015 og hefur hann ekki verið nein undantekning hvað heimatilbúinn mat varðar, hér eru grautar eldaðir frá grunni og maukað alveg út í eitt.

Méf fannst löngu kominn tími til að deila þessari reynslu sem ég hef með öðrum enda finnst mér gott efni hvað varðar mataræði barna af mjög skornum skammti. Ég ákvað því að búa til vefsíðu og miðla þar minni þekkingu, uppskriftum og ýmsum fróðleik. Þetta vatt þó upp á sig á meðan síðan var í smíðum og úr varð  netverslun líka þar sem hægt er kaupa vandaðar barnavörur sem allar hafa það sameiginlegt að vera lausar við öll eiturefni og vera umhverfisvænar.

Ég hef haft brennandi áhuga á næringarfræði síðan í menntaskóla og lesið mér heilmikið til í þeim efnum. Ég hef gaman af því að prófa mig áfram í eldhúsinu og töluverða reynslu af því að gefa börnum að borða eftir að hafa grautað og maukað meira og minna sl. 15 ár. Sá fróðleikur sem ég deili með ykkur hér byggir á minni eigin reynslu og þeirri þekkingu sem ég hef viðað að mér í gegnum árin. Vona að þið hafið gagn og gaman af síðunni.

Íris